നിമിഷങ്ങൾ വിലപ്പെട്ടതാണ്

നിമിഷങ്ങൾ വിലപ്പെട്ടതാണ്

സമയം വിലപ്പെട്ടതാണെന്നതിൽ സംശയമുണ്ടോ...? ഏയ്..നമുക്ക് നിസ്സംശയം പറയാം അത് വിലപ്പെട്ടത് തന്നെ.. എന്തുകൊണ്ട്..? കഴിഞ്ഞു പോയ സമയം തിരികെ കിട്ടാത്തതു കൊണ്ട്...നമ്മുടെ ആയുസ്സിന്റെ അളവ് നമുക്കറിയാത്തതുകൊണ്ട്...അതെ ഓരോ മിനിട്ടും വിലപ്പെട്ടതാണ്. നിന്റെ ജീവിതത്തിൽ നീ പാഴാക്കിക്കളഞ്ഞ ഓരോ മിനിട്ടിനെക്കുറിച്ചും നീ ചിന്തിക്കുക. അതിൽ നിനക്ക് എന്തൊക്കെ നേടാൻ കഴിയുമായിരുന്നുവെന്ന്..അല്പം മനസ്സാന്നിധ്യത്തോടെ ഇനിയുള്ളത് വായിക്കുക. ഓരോ സെക്കന്റുകളുടെയും മൂല്യം നിന്നെ ചിന്തിപ്പിച്ചേക്കാം തിരുത്തിയേക്കാം...

★ ഒരു മിനിട്ടിനുള്ളിൽ നിനക്ക് സൂറത്തുൽ ഫാതിഹ ഏഴു പ്രാവശ്യം പാരായണം ചെയ്യാൻ കഴിയും. സൂറത്തുൽ ഫാത്തിഹ ഒരു പ്രാവശ്യം പാരായണം ചെയ്യുന്നതിലൂടെ 1400 ലധികം നന്മകൾ നേടാൻ കഴിയുമെന്ന് പറയപ്പെടുമ്പോൾ നീയതിനെ ഏഴു പ്രാവശ്യം പാരായണം ചെയ്യുമ്പോൾ നിനക്ക് കിട്ടിയത് 9800 ലധികം നന്മകൾ..! വെറും ഒരു മിനിട്ടിലാണെന്നോർക്കണം....

★ മിനിട്ടിൽ സൂറത്തുൽ ഇഖ് ലാസ് ( ഖുൽ ഹുവല്ലാഹു...) 20 തവണയെങ്കിലും പാരായണം ചെയ്യാം. അത് ഒരു തവണ പാരായണം ചെയ്താൽ ഖുർആനിന്റെ മൂന്നിലൊന്ന് പാരായണം ചെയ്യുന്നതിന് സമാനമത്രെ. അത് 20 തവണയാകുമ്പോൾ എത്ര പ്രതിഫലമെന്ന് ചിന്തിക്കുക..

★ വിശുദ്ധ ഖുർആനിന്റെ ഒരു പേജെങ്കിലും ഒരു മിനിട്ട് കൊണ്ട് പാരായണം ചെയ്യാം. ഒരു ഹർഫിന് പത്ത് നന്മകൾ വെച്ച് ഒരു പേജിന്...!

★ ഒരു ചെറിയ ആയത്ത് നിനക്ക് മനപാഠമാക്കാം. അതും മഹത്വത്തിൽ ചെറുതൊന്നുമല്ല...

★ഈ ദിക്ർ 

( لااله الا الله وحده لا شريك له،له الملك وله الحمد وهو علي كل شيئ قدير)

 നിനക്ക് 20 വട്ടം ചൊല്ലാം. അപ്പോൾ നീ ഇസ്മാഈൽ (അ) ന്റെ സന്താനങ്ങളിൽപ്പെട്ട  8 അടിമകളെ മോചിപ്പിച്ചവനെപ്പോലെയായി.

★ മിനിട്ട് ഒന്നിൽ سبحان الله وبحمده എന്ന ദിക്ർ 100 പ്രാവശ്യം ചൊല്ലാൻ കഴിയും. കടലിലെ നുരകൾക്ക് സമാനമാണെങ്കിൽ പോലും നിന്റെ ചെറുപാപങ്ങൾ പൊറുക്കപ്പെടും...

★ ഒരു മിനിട്ട് സമയം കൊണ്ട്  سبحان الله وبحمده سبحان الله العظيم അൻപത് പ്രാവശ്യം ചൊല്ലാൻ സാധിക്കുന്നു. അവകളാകട്ടെ നാവുകൾക്ക് കനം കുറഞ്ഞത്...മീസാനിൽ കനം തൂങ്ങുന്നത്...റഹ്മാനായ അല്ലാഹുവിന് ഇഷ്ടമുള്ളത്..!

★ ഈ ദിക്ർ (لا حول ولا قوة الا بالله) 40 ലധികം ചൊല്ലാം. അത് സ്വർഗീയ നിധികളിൽ പെട്ട ഒരു നിധിയത്രെ...

★ ശഹാദത്തിന്റെ വചനം ലാഇലാഹ ഇല്ലല്ലാഹ് ഏകദേശം 50 പ്രാവശ്യമെങ്കിലും ചൊല്ലാൻ കഴിയും. തൗഹീദിന്റെ പരിശുദ്ധമായ വചനമാണത്. ആരുടെയെങ്കിലും അന്ത്യവചനം അതായി തീർന്നാൽ അവൻ സ്വർഗത്തിലെത്തുമെന്നാണ് തിരുവചനം. വിവരണാതീതമാണ് അതിന്റെ മഹത്വങ്ങൾ...

★ ഒരു തസ്ബീഹിന്റെ പ്രതിഫലത്തേക്കാൾ ഇരട്ടിയായ പ്രതിഫലങ്ങൾ നേടിത്തരുന്ന ഈ തസ്ബീഹ്  

سبحان الله وبحمده، عدد خلقه، ورضا نفسه، وزنة عرشه، ومداد كلماته

   മിനിട്ടിൽ 15 പ്രാവശ്യം നിനക്ക് ചൊല്ലാം...

★ അസ്തഗ്ഫിറുല്ലാഹ് എന്ന വചനം 100 ൽ കുറയാതെ നിനക്ക് ചൊല്ലാൻ കഴിയും. ഇസ്തിഗ്ഫാറിന്റെ നേട്ടങ്ങൾ ചെറുതൊന്നുമല്ല. പാപമോചനത്തിനും സ്വർഗപ്രവേശനത്തിനും ജീവിതാഭിവൃദ്ധിക്കും കാരണവും മുഴുവൻ പ്രതിസന്ധികൾക്കുള്ള പരിഹാരവുമാണ്...

★ കുറഞ്ഞത് ഒരു 50 സ്വലാത്തെങ്കിലും നിനക്ക് ചൊല്ലാനാകും. പകരം അല്ലാഹു നിന്റെ മേൽ ചൊരിയുന്നത് 500. ഒന്നിന് പകരം പത്താണല്ലോ...

★ അല്ലാഹുവിന്റെ അത്ഭുത സൃഷ്ടികളെക്കുറിച്ച് നിനക്കല്പം ചിന്തിക്കാം...

★ അവന് നന്ദി ചെയ്യുന്നതിലും അവനിൽ ഇഷ്ടം വെക്കുന്നതിലും അവനെ ഭയപ്പെടുന്നതിലും അവനിൽ പ്രതീക്ഷ വെക്കുന്നതിലുമായി നിന്റെ ഹൃദയത്തെ നിനക്ക് തിരിച്ചു വിടാം...

★ ഒരു മിനിട്ട് കൊണ്ട് പ്രയോജനപ്രദമായ രചനകൾ രണ്ടു പേജെങ്കിലും നിനക്ക് വായിച്ചു തീർക്കാം...

★ കോൾ വഴിയോ മെസേജ് മുഖാന്തിരമോ നിനക്ക് കുടുംബബന്ധം ഊട്ടിയുറപ്പിക്കാം....

★ കൈകളുയർത്തി റബ്ബിനോടല്പം പ്രാർത്ഥിക്കാം...

★ പലരോടും നിനക്ക് സലാം പറയാം,അവരെ മുസാഫഹ ചെയ്യാം...

★ നന്മ കല്പിക്കാനും തിന്മ തടയാനും നിന്റെ സഹോദരന് ഒരു ഉപദേശം നൽകാനും നന്മക്ക് വേണ്ടി ശുപാർശ ചെയ്യാനും നിനക്ക് കഴിയും...

★ വഴിയിൽ നിന്നും ഉപദ്രവകാരിയായ ഒരു വസ്തുവിനെ നിനക്ക് നീക്കം ചെയ്യാം...

 ഇങ്ങനെ എത്രയെത്ര നന്മകളാണ് ഓരോ മിനിട്ടിലും നമുക്ക് നേടിയെടുക്കാൻ കഴിയുക. അതുവഴി നിന്റെ പദവികൾ ഉയർത്തപ്പെടുന്നു. നന്മകൾ വർധിക്കുന്നു. തിന്മകൾ മായ്ക്കപ്പെടുന്നു. സ്വർഗവാസികളുടെ പട്ടികയിൽ നീയും പേര് ചേർക്കപ്പെടുന്നു. നരക വാസികളുടെ ലിസ്റ്റിൽ നിന്നും നീ ഒഴിവാക്കപ്പെടുന്നു. ഇങ്ങനെ നീളുന്നു നേട്ടങ്ങളുടെ പട്ടിക..

       ഒരു കാര്യം പ്രത്യേകം ശ്രദ്ധിക്കണം...ഇഖ് ലാസും തഖ് വയുമാണ് നിന്റെ നേട്ടങ്ങളുടെ എണ്ണവും വണ്ണവും നിയന്ത്രിക്കുന്നത്....